Hindi dapat ituloy ang 100% on-site reporting sa mga pampublikong guro

Matapos ang dalawang taon sa work-from-home set-up, nitong linggo ay nagsimula nang magtrabaho mula sa kanilang mga paaralang pinapasukan ang mga pampublikong guro.

Ito ay bilang pagtalima sa Department of Education memorandum #29-2022 na nilagdaan ni Education Secretary Leonor Briones noong Abril 6 na nagsasaad na dapat ay mag-100% on-site reporting na ang lahat ng guro at iba pang empleyado ng paaralan basta nasa alert level 1 ang lungsod o lalawigan.

Mariing tinutulan ito ng mga organisasyon ng mga guro gaya ng Alliance of Concerned Teachers at Teachers’ Dignity Coalition. Maging ang mga guro ay nagpahayag rin ng kanilang mga negatibong opinyon sa pamamagitan ng social media.

Para sa akin, hindi na akma na isige pa ang 100% on-site reporting ng mga public school teachers ngayong huling quarter na ng school year 2021-2022.

Bakit kailangang mag 100% on-site reporting ang mga guro gayong hindi pa naman bumabalik nang 100% ang face-to-face classes?

Ito ang ilan sa mga problemang sa palagay ko ay hindi naisa-alang-alang ng mga nasa likod ng DepEd Order na ito, lalo na ni Education Secretary Leonor Briones:

1) Walang magandang internet connection sa ating mga paaralan, kahit na sabihing may Smart pocket wifi naman lahat. Malaking hadlang ito sa pagdadaos ng online classes.

2) Maraming mga guro na walang laptop at naka-depende sa desktop, at sila ay hindi makakapag-daos ng klase maliban na lang kung may ipapagamit na desktop o laptop ang mga paaralan.

3) Problema rin ang kakulangan ng espasyo para sa mga guro na sabay-sabay magdadaos ng online classes sa mga paaralan.

Maliban sa hindi masusunod ang physical distancing, palaisipan rin kung paano magiging maayos ang daloy ng online classes kung magkakatabi ang mga teacher habang nagtatalakayan.

4) Hindi pa rin 100% na maaasahan ang pampublikong transportasyon sa bansa. Problema ito lalo’t hindi naman lahat ng public school teacher ay nakatira na “walking distance” mula sa kung saan sila nagtuturo. Lalo namang hindi lahat ay may sasakyan.

5) Paano ang kapakanan ng mga gurong senior citizens at may comorbidity?

6) Ano ang protocol para sa mga gurong baka magka-COVID sa pagganap ng tungkulin? Maliban sa pagsasabing pwede nilang gamitin ang kanilang mga service leave credits, ano pang mga tulong ang maaasahan ng mga guro mula sa DepEd?

Sa totoo lang, malaki na ang naging puhunan ng mga guro upang makasabay sa mga kahingian ng “new normal” sa edukasyon. May mga bumili ng desktop at laptop, nag-upgrade ng Internet service provider, bumili ng head set, ring light, etc.

Hindi ba nakikita ng DepEd na kayang gampanan ng mga guro ang kanilang mga trabaho kahit nasa bahay? Ayon nga sa isang kasabihan sa Ingles, “If it’s not broken, don’t fix it.”

About Author

Mark Pere Madrona

The Filipino Scribe (TFS) is managed by Mark Pere Madrona, a multi-awarded writer and licensed professional teacher from the Philippines.

Mr. Madrona earned his master’s degree in history from the University of the Philippines-Diliman last 2020. He obtained his bachelor’s degree in journalism cum laude from the same university back in 2010. His area of interests includes Philippine journalism, history, and politics as well as social media.

Know more about him here: https://www.filipinoscribe.com/about/.

See author's posts